TKTA tərəfindən “İnşaat ustası ” peşə ixtisası üzrə bacarıqlar qiymətləndirilib

08-10 iyun 2026-cı il tarixlərində Təhsildə Keyfiyyət Təminatı Agentliyi (TKTA) və “Norm” ASC-nin birgə tərəfdaşlığı çərçivəsində Qeyri-formal və informal təhsilin tanınması istiqamətində “İnşaat ustası” peşə ixtisası üzrə qiymətləndirilmə imtahanı təşkil edilib. Norm Ustalar Klubunun üzvü olan 26 nəfər imtahana cəlb olunub.

Qeyd edək ki, sözügedən peşə ixtisası üzrə nəzəri imtahan mərhələsini uğurla başa vuran namizədlər praktiki imtahanda iştirak etmək üçün Sənaye və İnnovasiyalar üzrə Bakı Dövlət Peşə Təhsil Mərkəzinə dəvət olunublar.

TKTA-nın Hüquq təminatı departamentinin direktoru Vüqar Bağırlının sədrlik etdiyi Qiymətləndirmə Komissiyasının tərkibində Dövlət Məşğulluq Agentliyinin İdarə Heyəti sədrinin müşaviri Fuad Mehdizadə, "Business Insight International Research Group" şirkətində Korporativ Sosial Məsuliyyət üzrə layihə meneceri Nuranə Hüseynli, sahə üzrə müstəqil ekspert qismində isə Bakir Quliyev iştirak ediblər.

Sözügedən fəaliyyətin əsas məqsədi vətəndaşların əmək bazarına inteqrasiyasını dəstəkləmək, onların məşğulluq və gəlir imkanlarını genişləndirmək, eləcə də bu istiqamətdə həyata keçirilən dövlət siyasətinə töhfə verməkdir.

Məlumat üçün bildiririk ki, TKTA tərəfindən qeyri-formal və informal yollarla əldə edilmiş bilik, bacarıq, səriştə və təcrübənin qiymətləndirilməsi və tanınması prosesi iki mərhələdən ibarətdir. İlk mərhələdə namizədlər nəzəri imtahanda iştirak edirlər. Bu mərhələni uğurla tamamlayan şəxslər ikinci mərhələyə — praktiki imtahana keçid hüququ qazanırlar. Hər iki mərhələni uğurla başa vuran namizədlərə yekunda müvafiq peşə sənədi təqdim olunur.

Əlavə olaraq qeyd edək ki, Agentlik tərəfindən təqdim edilən müvafiq sənədlər Azərbaycan Respublikasının Nazirlər Kabinetinin 5 avqust 2020-ci il tarixli 279 nömrəli Qərarına əsasən, ilk peşə təhsili səviyyəsi üzrə təhsil haqqında sənədə bərabər tutulur. Həmin sənəd sahibinə peşə təhsili pilləsinin növbəti səviyyəsində təhsilini davam etdirmək və eləcə də müvafiq peşə ixtisası üzrə əmək fəaliyyətinə başlamaq hüququ verir.

Source of the news: https://tkta.edu.az/az/media/news/1442

P.S. Do you have a cool CSR idea and/or looking for a sponsor? Please fill the form on Opportunities page or discuss it via forum