UNEC ilə PAŞA Kapital İnvestisiya Şirkəti arasında memorandum imzalanıb
“PAŞA Kapital İnvestisiya Şirkəti” QSC-nin Baş İcraçı direktoru İsi Mustafayevin rəhbərlik etdiyi nümayəndə heyəti UNEC-də olub.
UNEC rektoru professor Ədalət Muradov və müvafiq struktur rəhbərlərinin iştirakı ilə keçirilən görüşdə universitetlə real sektor arasında əməkdaşlığın və davamlı kommunikasiyanın genişləndirilməsinin əhəmiyyəti vurğulanıb. Bildirilib ki, UNEC ilə PAŞA Kapital arasında əməkdaşlıq tələbələrin maliyyə və kapital bazarları üzrə nəzəri biliklərini real biznes təcrübəsi ilə zənginləşdirməsinə, onların əmək bazarına hazırlığına və peşəkar inkişafına töhfə verəcək.
Müzakirələrin nəticəsi olaraq, UNEC və PAŞA Kapital İnvestisiya Şirkəti arasında əməkdaşlığa dair memorandum imzalanıb.
Memorandumda UNEC-in müvafiq ixtisaslar üzrə təhsil alan tələbə və magistrantları üçün təcrübə proqramlarının təşkili, praktiki təlimlərin, seminarların, master-klassların və keçirilməsi nəzərdə tutulur.
Əməkdaşlıq çərçivəsində tələbə və məzunlar üçün karyera və iş imkanlarının yaradılması, təqaüdlərin verilməsi, müvafiq laboratoriyanın qurulması, eləcə də tələbələrin istehsalat təcrübəsinin təşkilinə dəstək göstərilməsi planlaşdırılır.
Tərəflər, həmçinin maliyyə savadlılığının artırılmasına yönəlmiş maarifləndirici tədbirlərin keçirilməsi və korporativ sosial məsuliyyət çərçivəsində birgə təşəbbüslərin həyata keçirilməsi istiqamətində əməkdaşlıq edəcəklər.
Comments