Göygöldə təhlükəsiz internet təlimləri

“AZCON Holding” şirkətlərindən olan “Aztelekom” MMC və Məktəbəqədər və Ümumi Təhsil üzrə Dövlət Agentliyinin (MÜTDA) birgə təşkilatçılığı ilə “İnternetdən təhlükəsiz istifadə bacarıqları” korporativ sosial məsuliyyət layihəsi çərçivəsində təlimlər davam edir.

Təlimlərin keçirilməsində məqsəd müəllim və şagirdlər arasında internetdən düzgün və təhlükəsiz istifadə vərdişlərinin formalaşdırılması, rəqəmsal savadlılığın artırılması və onlayn risklərdən qorunma sahəsində məlumatlılığın gücləndirilməsidir.

Layihə çərçivəsində növbəti təlim Göygöl rayonunun Bəhman Alzamanov adına Quşqara kənd tam orta məktəbində keçirilib. Təlimlərə Araz Möyləmov adına Xaqani kənd tam orta ümumtəhsil məktəbinin müəllim və şagirdləri qoşulublar.

Təlimdə “Aztelekom”un mütəxəssisləri tərəfindən iştirakçılara fərdi məlumatların qorunması, rəqəmsal təhlükəsizlik, sosial şəbəkələrdə davranış qaydaları, onlayn risklərdən qorunma üsulları və məsuliyyətli internet istifadəsi mövzularında məlumat verilib.

Sessiyalar interaktiv formada təşkil olunaraq real vəziyyətlərə əsaslanan müzakirələr və praktiki yanaşmalar üzərində qurulub.

Qeyd edək ki, layihə bu günədək Lənkəran, Qusar, Şəki və Balakən rayonlarının kənd məktəblərinin müəllim və şagirdlərini əhatə edib. Eyni zamanda, Şəki–Zaqatala, Lənkəran–Astara, Quba–Xaçmaz və Gəncə–Daşkəsən regional təhsil idarələrinin tabeliyində olan məktəblərin müəllimləri üçün onlayn təlimlər təşkil olunub. Növbəti mərhələlərdə layihənin ölkənin digər regionlarını da əhatə etməsi planlaşdırılır.

Source of the news: https://special.azertag.az/az/xeber/4218839

P.S. Do you have a cool CSR idea and/or looking for a sponsor? Please fill the form on Opportunities page or discuss it via forum