“Azərsun Holdinq”in dəstəyi ilə “Vikipediya”nın 25 illiyi qeyd olunub

“Azərsun Holdinq” doğma dilimizin qorunması və xüsusən də rəqəmsal məcrada inkişaf etdirilməsi məqsədilə layihələrini davam etdirir.

Bu layihələr çərçivəsində şirkətlər qrupu “Vikimedia Azərbaycan” İstifadəçi Qrupu ilə birgə “Azərbaycan dilinin rəqəmsal ensiklopediyası: #Vikipediya 25” adlı tədbir təşkil edib.

Panel-müzakirə formatında keçirilən tədbirdə dövlət rəsmiləri, millət vəkilləri “Azərsun Holdinq”in rəhbər heyəti, Azərbaycan Vikipediya icmasının və “Vikimedia Azərbaycan” İstifadəçi Qrupunun üzvləri, Vikimedia Fondunun Mərkəzi və Şərqi Avropa ölkələri üzrə regional qovşağı layihəsinin koordinatoru Barbara Klen iştirak ediblər. Müzakirələrdə Azərbaycan dilində Vikipediyanın zənginləşdirilməsi və süni intellekt dövründə bu platformanın vacibliyi əsas yer tutub.

“Vikimedia Azərbaycan” İstifadəçi Qrupunun İdarə Heyəti sədrinin müavini Aida Aslanova çıxışında Vikipediyada yer alan 200 min məqalənin arxasında böyük və fədakar bir icmanın dayandığını, əlavə olunan hər bir məqalənin isə gələcək nəsillər üçün qiymətli miras olduğunu bildirib. Bu icma Azərbaycanca Vikipediyada Azərbaycan dilini, mədəni irsini, tarixi şəxsiyyətlərini bu platforma vasitəsilə dünyaya çatdırır.

“Azərsun Holdinq”in baş direktorunun müavini Nazim Quliyev çıxışında Azərbaycan Respublikasının Prezidenti cənab İlham Əliyevin doğma dilimizlə bağlı tövsiyə və tapşırıqlarına uyğun olaraq Şirkətlər Qrupunun bu istiqamətdə müxtəlif layihələrin icrasına başladığını bildirib. O, həyata keçirilən “vikisun.az” layihəsi çərçivəsində şirkətin əməkdaşları tərəfindən Azərbaycanca Vikipediyaya 5 minə yaxın ensiklopedik məqalə əlavə etdiyini də qeyd edib.

“Azərsun Holdinq”in İctimaiyyətlə əlaqələr şöbəsinin müdiri Rza Məmmədov qeyd edib ki, Şirkətlər Qrupu 35 ildir ki, ölkənin qida təhlükəsizliyini təmin etməklə bərabər müxtəlif istiqamətdə sosial layihələr həyata keçirib: “Bu il Azərbaycan dili korporativ sosial məsuliyyət üzrə əsas istiqamətimizdir. Məqsədimiz illərdir ki, Vikipediyaya məqalə yerləşdirən gənclərə dəstək olmaqdır”. 

Tədbir çərçivəsində icmanın aktiv üzvlərinə müxtəlif mükafatlar və təşəkkürnamələr verilib. Eyni zamanda, “Vikimedia Azərbaycan” İstifadəçi Qrupu tərəfindən “Azərsun Holdinq”in Müşahidə Şurasının sədri Tahir Gözelə, gənclər və idman naziri Fərid Qayıbova, Qeyri-Hökumət Təşkilatlarına Dövlət Dəstəyi Agentliyinin İdarə Heyətinin sədri Aygün Əliyevaya təşəkkürnamələr təqdim olunub.

Source of the news: https://unikal.az/news/526470/azersun-holdinqin-desteyi-ile-vikipediyanin-25-illiyi-qeyd-olunub-fotolar

P.S. Do you have a cool CSR idea and/or looking for a sponsor? Please fill the form on Opportunities page or discuss it via forum